UGONJWA WA MWAKYEMBE... SIRI YAFICHUKA

Elvan Stambuli na Makongoro Oging'

 SIRI ya ugonjwa wa Naibu Waziri wa Ujenzi, Dk Harrison Mwakyembe ambaye amesema kuwa ana matatizo kwenye Uboho (Bone marrow), imefichuka.
Dk. Mwakyembe ambaye pia ni Mbunge wa Kyela hadi sasa bado wataalamu katika Hospitali ya Apollo nchini India anakotibiwa wanafanyia uchunguzi uboho wake, lakini daktari mmoja amefichua siri ya ugonjwa wa sehemu hiyo.
TATIZO LA KITAALAMU
Akizungumza na gazeti hili wiki iliyopita daktari mmoja wa Hospitali ya Taifa ya Muhimbili ambaye aliomba jina lake lisiandikwe gazetini alisema binadamu akiwa na matatizo katika uboho yaani urojo ulio katikati ya mfupa ni tatizo zito.
“Kwa kuwa Dk. Mwakyembe hajafafanua katika bone marrow (uboho) yake kumekutwa na nini kama walivyomuambia madaktari wa Apollo India lakini nakuhakikishia kuwa mtu yeyote aliye na matatizo sehemu hiyo ya mwili huwa ana tatizo zito siyo jepesi.
“Kwa mfano, katika urojo huo mtu anaweza kugundulika kuwa na Leukemia (kansa ya damu), ambapo bone marrow huzalisha white cells (seli nyeupe) ambazo siyo za kawaida, hivyo mgonjwa kujikuta akiwa na aplastic anemia yaani uboho hushindwa kuzalisha red blood cells (seli nyekundu za damu) na kupata kansa ya damu, ugonjwa uliomuua Nyerere, (Julius Kambarage ),” alisema daktari huyo.
Daktari huyo alifichua siri zaidi kwa kuongeza kusema kwamba binadamu akiwa na tatizo katiba uboho anaweza pia kujikuta akipatwa na ugonjwa unaoitwa kitaalamu lymphoma ambao hudhuru uzalishaji wa chembechembe za damu ( blood cells) mwilini.

TIBA YAKE
Alipoulizwa mtu akiwa na hali hiyo anaweza kupewa tiba gani, daktari huyo alisema matibabu yanategemea na jinsi ugonjwa ulivyoathiri uboho.
“Tiba yake inaweza kufanywa kwa kutumia dawa mbalimbali au kwa kubadilishwa damu au ikibidi kutia kwenye mifupa uboho mwingine, ” alifafanua daktari huyo.
Hivi karibuni kumekuwa na mvutano mkubwa kati ya Dk. Mwakyembe ambaye anatetewa na Waziri wa Ushirikiano wa Afrika Mshariki, Samweli Sitta anayedai kuwa mbunge huyo wa Kyela amelishwa sumu lakini Mkurugenzi wa Upelelezi na Makosa ya Jinai nchini, DCI Robert Manumba hivi karibuni alisema kuwa naibu waziri huyo hajalishwa sumu.

RIPOTI YA HOSPITALI YA INDIA
Naye Dk. Mwakyembe akadai kuwa alichokisema DCI Manumba kwa waandishi wa habari hakifanani kabisa na picha iliyo kwenye taarifa halisi ya Hospitali ya Apollo ya India anakotibiwa.
“Ripoti inatamka wazi kuwa kuna kitu kwenye bone marrow kinachochochea hali niliyonayo, kitu ambacho mabingwa wanahangaikia kukijua…Lakini vyombo vyetu vya dola vinapelekeshwa na mafisadi kusema bila msingi wa kisayansi wala aibu kwamba ‘sikulishwa sumu’, ‘sikulishwa sumu,” alisema Mwakyembe katika taarifa hiyo.Aliongeza: “Nimelazimika kutoa taarifa hii kwa vyombo vya habari kufuatia mkutano wa DCI Robert Manumba na waandishi wa habari uliofanyika kuongelea, pamoja na mambo mengine, hali yangu ya afya na kuhitimisha, kienyejienyeji tu kuwa, sikunyweshwa sumu.”

MAWAZIRI WA NCHI MBALI MBALI WAKUTANA KUJADILI HALI YA WANAWAKE WA VIJIJINI

Ujumbe wa Tanzania katika Mkutano wa 56 wa Tume ya Umoja wa Mataifa kuhusu Hali ya Wanawake ukiwa katika picha ya pamoja na Naibu Katibu Mkuu wa Umoja wa Mataifa, kutoka kulia ni Bibu Grace Mbwilo Wizara ya Maendeleo ya Jamii, Bibi Kijakazi Mtengwa, Katibu Mkuu Wizara ya Maendeleo ya Jamii, Jinsia na Watoto, Bi Rahma Ali Khamis Mkurugenzi kutoka ZNZ, Mhe. Sophia Simba (Mb) Waziri wa Maendeleo ya Jamii, Jinsia na Watoto, Mhe. Naibu Katibu Mkuu, Asha-Rose Migiro, Msajiri wa Mahakama ya Rufaa Bw. Francis Mtungi, Mhe. Zainabu Muhamed, Waziri wa Jamii na Maendeleo ya Vijana, Wanawake na Watoto, Serikali ya Mapinduzi Zanzibar,Mhe. Iman Daud Aboud Jaji wa Mahama ya Rufaa, Bibi Ellen Maduhu Afisa Ubalozi anayeshughulikia Kamati ya Tatu, Bibi Teodosia Mbunda Maendeleo ya Jamii na Bibi Joyce Mlowe kutoka Wizara ya Katiba na Sheria

Naibu Katibu Mkuu wa Umoja wa Mataifa, Asha- Rose Migiro akiwa na Mhe. Zainabu Omar Muhamed, Waziri wa Jamii na Maendeleo ya Vijana, Wanawake na Watoto kutoka Serikali ya Mapinduzi Zanzibar na Mhe. Sophia Simba , Waziri wa Maendeleo ya Jamii, Jinsia na Watoto walipokaribishwa ofisini kwa Naibu Katibu Mkuu. 

Mhe. Sophia Simba ( Mb) Waziri wa Maendeleo ya Jamii, Jinsia na Watoto akichangia majadiliano kuhusu uwezeshwaji wa wanawake wa vijiijini katika siku ya kwanza ya mkutano wa 56 wa Tume ya Umoja wa Mataifa kuhusu Hali ya Wanawake. Mkutano huu ambao ni wa wiki mbili umefunguliwa na Naibu Katibu Mkuu wa Umoja wa Mataifa, Asha- Rose Migiro. Mada kuu ya mkutano huu ni nafasi ya wanawake wa vijijini na michango yao katika kupambana na umaskini na njaa, na jinsi gani ya kuwapatia uwezo ili kuwa kichocheo cha maendeleo endelevu. Aliyekaa nyuma na Waziri Simba ni Mhe. Zainabu Omar Muhamed. Waziri wa Jamii na Maendeleo ya Vijana, Wanawake na Watoto kutoka Serikali ya Mapinduzi Zanzibar.


                                                 NA Mwandishi Maalum

New York Mawaziri wanaohusika na masuala ya maendeleo ya wanawake kutoka nchi wanachama wa Umoja wa Mataifa, wameanza mkutano wao wa wiki mbili ambapo watajadiliana na kubadilishana mawazo kuhusu hali ya wanawake hasa wale wa vijijini.
Mkutano huo ambao ni wa 56 umeandaliwa na Tume ya Umoja wa Mataifa kuhusu Hali ya Wanawake na umefunguliwa rasmi siku ya jumatatu na Naibu Katibu Mkuu wa Umoja wa Mataifa Dk. Asha-Rozi Migiro hapa Makao Makuu ya Umoja wa Mataifa, Jijini New York, Marekani
Mada kuu ya mkutano huo ni “ nafasi ya wanawake wa vijijini na mchango wao katika kupambana na umaskini na njaa. Na namna gani wanaweza kuwezeshwa ili wapate nguvu ya kuwa kichocheo cha maendeleo endelevu”.
Ujumbe wa Jamhuri ya Muungano wa Tanzania katika mkutano huu unaogozwa na Waziri wa Maendeleo ya Jamii, Jinsia na Watoto, Mhe. Sophia Simba ( Mb) akiwamo pia Mhe. Zainabu Omar Muhamed(Mb) Waziri wa Jamii na Maendeleo ya Vijana, wanawake na Watoto kutoka Serikali ya Mapinduzi ya Zanzibar.
Wengine waliomo katika ujumbe huo wa Tanzania, ni Bibi Kijakazi Mtengwa, Katibu Mkuu Wizara ya Maendeleo ya Jamii, Jinsia na Watoto, Mhe. Iman Daud Aboud, Jaji Mahakama ya Rufaa, Bi Rahma Ali Khamis, Mkurugenzi wa Jinsia kutoka Zanzibar, Bw. Francis Ali Khamis Mtungi, Msajiri wa Mahakama ya Rufaa.,Bibi Grace Job Mbwilo, | Page Afisa Maendeleo ya Jamii Mwandamizi Wizara ya Maendeleo ya Jamii, Jinsia na Watoto , Bibi Joyce Mlowe kutoka Wizara ya Katiba na Sheria na Bibi Teodosia Mbuda, Wizara ya Maendeleo ya Jamii, Jinsia na Watoto
Akifungua mkutano huo, Naibu Katibu Mkuu ameeleza kwamba kama wanawake wa vijijini wangepewa fursa sawa ya kupewa nyenzo za uzalishaji, hapana shaka uzalishaji wa mazao ya kilimo ungeongezeka maradufu na kiwango cha njaa kingeshuka.
Hata hiyo anasema Migiro “ ukweli ni kwamba wanawake wa vijijini na wasichana wanaendelea kukabiliwa na vikwazo vingi vikiwamo ya upatikanaji wa ardhí, pembeje za kilimo, mitaji ya fedha , huduma na ugani na teknolojia za kisasa”
Na kuongeza kwamba, bado wanawake wa vijijini wanaendelea kukabiliwa na ugumu katika upatikanaji wa huduma za msingi zikiwano za ulizi wa jamii, ajira na masoko ya uhakika.
Na kwa sababu hiyo ametoa wito kwa wajumbe wa mkutano huo kujadiliana kwa kina kuhusu mikakati itakayowawezsha wanawake wa maeneo ya vijijini kuongeza uwezo wao wa kupambana na umaskini uliokithiri, njaa na kujiletea maendeleo endelevu katika familia zao.
Aidha Migiro anasema kwamba ili hayo yote yaweza kufanikiwa kwanza ni lazima jamii itambue kwamba wanawake ni mawakala muhimu wa mabadiliko. Na kwamba wakisaidiwa katika jumuia zao kutasaidia sana katika kuhakikisha kwamba ,matakwa na vipaumbele vya wanawake wa vijijini yanapewa umuhimu unaostahili.
“ Mkutano wa mwaka huu wa Tume ya Umoja wa Mataifa kuhusu Hali ya Wanawake, ni fursa nzuri ya kufikia maamuzi ya pamoja kati ya serikali na Asasi zisizo za kiserikali kuhusu mikakati ambayo kweli inaweza kuleta mabadiliko ya kweli kuhusu maisha ya wanawake wa vijijini “. Akasititiza Naibu Katibu Mkuu.
Kwa upande wake Waziri Sophia Simba akichangia majadiliano kuhusu hali ya wanawake wa vijijini, ameeleza kwamba, Tanzania licha ya kuweka será na sheria zinazolenga kumsaidia mwanamke pia imeanzisha benki ya wanawake inayolenga kumkomboa kiuchumi mwanamke akiwao yule wa kijijini.
Hata hivyo anasema ili será, na mipango iliyowekwa na serikali iweze kweli kumnufaisha mwanamke, ikiwamo mpango mkakati wa Kilimo Kwanza, bado suala la elimu ni muhimu sana kwa wanawake.
Akasema ni kwa kupitia elimu ndipo kweli mwanamke hasa yule wa kijijini kwanza, anaweza kujitambua yeyé ni nani lakini pia ataweza kuzitumia fursa anazo pewa kikamilifu.
Akatoa mfano kwa kusema kuwa katika kutambua umuhimu wa elimu si kwa wanawake tu, ndiyo maana serikali inaendelea kutekeleza upelekaji wa elimu ya msingi hadi ngazi ya kila kijiji na elimu ya sekondari kwa kila kata.
“ wanawake wakiwa na elimu watakuwa na uelewa mpana wa kukabiliana na changamoto mbalimbali zikiwamo za kudhulumiwa mali zao , lakini watakuwa na fursa ya kufahamu namna bora ya kutumia teknolojia za kisasa za kilimo, matumizi sahihi ya mitaji ya raslimali fedha na kubwa zaidi watajijengea uwezo mkubwa wa kupokea na kuzitumia kikamilifu na huduma mbalimbali zinazolengwa kuwainua na kukabiliana na mfumo dume ” akasisitiza Waziri Sophia Simba.
Kuhusu namna gani Umoja wa Mataifa unaweza kushirikiana na serikali katika kuchagiza maendeleo ya wanawake. Waziri Simba ametoa wito wa taasisi hiyo ya kimataifa, kuhakikisha kwamba inafanya kazi kwa karibu na serikali na kuzisaidia pale inapobidi kwa kusaidia uratibu na utekelezaji wa será, mipango na mikakati ambayo serikali inakuwa imejiwekea katika kuwakomboa na kuwaendeleza wanawake.

Chanzo: MAGANGA ONE.

NHIF WAKIWA LINDI

 Wadau wakifuatlia maenelezo ya Mwenyekiti wa Bodi ya NHIF

 Mwenyekiti wa NHIF, Ntunkamazina akimkabidhi kadi ya CHF mmoja wa waendesha pikipiki ambao wamejiunga na Mfuko huo.

    Kikundi cha waendesha pikipiki wakiwa wamesimama wakisubiri kupokea kadi zao za matibabu.
Na Grace Michael

 Itumieni NHIF kwa uzalendo-Ntunkamazina

Na Mwandishi Wetu, Lindi

MWENYEKITI wa Bodi ya Mfuko wa Taifa wa Bima ya Afya, Bw. Deogratius Ntunkamazina amewataka watoa huduma za afya nchini kuutumia Mfuko huo kwa uzalendo ili uweze kunufaisha Watanzania wote.

Amesema kuwa endapo Mfuko huo watautumia kwa ulafi na kwa kughubikwa na udanganyifu utafilisika na kushindwa kufikia malengo yanayokusudiwa na Serikali ya kuhakikisha asilimia kubwa ya wananchi wanakuwa kwenye utaratibu wa Bima ya Afya.

Bw. Ntunkamazina aliyasema hayo jana wakati akitoa salaam za Bodi ya Mfuko huo kwenye Mkutano wa Wadau uliofanyika mkoani Lindi uliokutanisha wadau mbalimbali wakiwemo wakitoa huduma, wanachama, viongozi wa kiserikali, kidini na wadau wengine.

"Mfuko wa Taifa wa Bima ya Afya ni fursa nzuri ya kuboresha huduma za afya nchini hivyo tumieni fursa hii kwa uzalendo mkubwa sana ili baadae wananchi wote waweze kunufaika na Mfuko huu. Mkiwa walafi na kuweka udanganyifu mwingi katika kuandaa madai yenu mtaufilisi Mfuko huu," alisema Ntunkamazina.

Mwenyekiti huyo wa Bodi alitumia maneno ya Kiongozi shupavu na mwana Falsafa Mahtma Gandhi kiongozi wa India, ambaye alinukuu maneno yake aliyowahi kusema kuwa “Dunia hii ina raslimali za kutosha mahitaji muhimu ya kila mtu lakini haina raslimali za kutosha ulafi wa kila mtu” mwisho wa kunukuu. Hivyo kwa kauli hiyo alisisitiza uzalendo katika kuutumia Mfuko huo.

Alisema kuwa endapo Mfuko huo utatumika ipasavyo Watanzania wote watanufaika lakini ukitumika isivyo utafilisika.

"Jamani hata Rais wetu ana ndoto kubwa na angependa kabisa aondokapo madarakani mwaka 2015 aache Watanzania asilimia 50 wakiwa chini ya utaratibu wa Bima ya Afya hivyo tumuungeni mkono kwa kila mdau kutimiza wajibu wake," alisema.

Naye Kaimu Mkoa wa Lindi ambaye pia ni Mkuu wa Wilaya hiyo, Magalula Said naye aliwasisitiza viongozi wote wa Halmashauri kuhakikisha wanaongeza juhudi katika uhamasishaji wa wananchi kujiunga na Mfuko wa Afya wa Jamii.

"Nimejaribu kupitia takwimu za hapa Lindi na nimegundua kuwa tunazidi kuporomoka katika suala hili la CHF hivyo kila mmoja kwa nafasi yake ajipange kuhakikisha hali hii inaondoka na wananchi wetu wanajiunga na Bima kwani ndio mkombozi wa afya kwa wote hivyo ni lazima tuiweke kama agenda ya kudumu katika vikao vyetu,' alisema.

Naye Mkurugenzi Mkuu wa NHIF, Emanuel Humba aliwaomba viongozi wa kisiasa wakiwemo madiwani kuhakikisha wanasimamia vyema fedha zitokanazo na mifuko hiyo ili ziweze kutumika katika matumizi sahihi hasa ya dawa

 

Chanzo: mjengwablog

Siri Ya Waraka Wa Mwakyembe Yafichuka

• Kisa ni kifo cha ghafla cha mhudumu ofisini kwake

na Mwandishi wetu

WARAKA wa siri ulioandikwa na Naibu Waziri wa Ujenzi, Dk. Harrison Mwakyembe, umezidi kuibua mambo mapya.

Waraka huo ulioripotiwa mara ya kwanza wiki iliyopita na gazeti hili na kueleza mbinu, mahala ambapo waziri huyo anaamini aliwekewa sumu kupitia sabuni na taulo vilivyowekwa ofisini kwake kwenye chumba cha kuoshea mikono, safari hii waraka huo unaendelea kwa kumtaja mhudumu aliyetumika kuweka vitu hivyo.

Kupitia waraka huo alioutoa kwa ndugu na rafiki zake wa karibu, Dk. Mwakyembe anasema mhudumu aliyetumika bila kujijua ni wa kike kutoka katika kijiji cha Ipinda, wilayani Kyela, mkoani Mbeya, ambaye alihamishiwa ofisini kwake.

Inaelezwa kuwa mhudumu huyo aliletwa katika ofisi hiyo siku chache kabla ya siku ya kuweka sabuni na taulo jipya ofisini kwa waziri huyo.

“Nilipoona kuwa najikuna mfululizo mara baada ya kunawia sabuni hiyo, siku ya tatu nilikuwa na wazo la kupeleka vitu hivyo kwa Mkemia Mkuu wa Serikali, lakini nilipofika ofisini, vilikuwa vimeshatolewa,” anasema Dk. Mwakyembe kupitia waraka huo.

Dk. Mwakyembe ambaye yuko nchini India kwa awamu ya pili ya matibabu, anasema alianza kumuuliza maswali ya kina mhudumu huyo ili kujua kwa nini vifaa hivyo viliondolewa ghafla wakati alivitumia siku moja, hakufanikiwa kupata majibu ya kina.

Naibu waziri huyo ambaye pia ni Mbunge wa Kyela, anadai katika mazingira ya kutatanisha, tena ndani ya muda mfupi tangu alipoanza kuathirika baada ya kunawia sabuni na kujifutia taulo hilo, mhudumu huyo wa kike alifariki na kuzikwa kijijini kwao Ipinda.

Tukio la kufariki ghafla kwa mhudumu huyo bila kuugua, limeacha maswali mengi sio tu kwa Dk. Mwakyembe, bali pia hata kwa rafiki zake wa karibu ambao wanaamini kwamba aliwekewa sumu.

Hata hivyo uchunguzi uliofanywa na gazeti hili kuhusiana na taarifa kwamba kuna mhudumu mmoja wa kike wa Dk. Mwakyembe alifariki zilithibitisha kuwa ni kweli.

Mmoja maafisa wa juu wa wizara hiyo, aliliambia Tanzania Daima Jumatano kwa sharti la kutotaja jina lake kuwa ni kweli mhudumu huyo aliyemtaja kwa jina moja la Sara Richard ambaye alikuwa akimsadia Naibu Waziri huyo alifariki Septemba 29, mwaka jana, na kuzikwa kijijini kwao Ipinda.

“Ni kweli kuna mhudumu mmoja ofisini kwa Dk. Mwakyembe alifariki mwaka jana. Ila sijui aliugua ghafla au vipi hilo sijui; isipokuwa ni kweli kwamba mwaka jana tulimpoteza mtumishi mmoja na tulimsafirisha hadi kwao Mbeya,” kilisema chanzo chetu cha habari.

Akihojiwa na gazeti hili kuzungumzia waraka huo na tukio hilo, Waziri wa Mambo ya Ndani, Shamsi Vuai Nahodha, alisema hajauona na kusisitiza kuwa Jeshi la Polisi linafanya uchunguzi wa kina kubaini ukweli wa jambo hili.

Hadi sasa wingu zito limetanda kuhusu afya ya Dk. Mwakyembe.

Wakati taarifa zisizo rasmi zikisema amepewa sumu, Mkurugenzi wa Makosa ya Jinai Nchini (DCI), Robert Manumba, amesema hajalishwa sumu...

 

Soma zaidi www.freemedia.co.tz

Balozi Mahalu Amlipua JK Mahakamani

ANIKA ALIVYOSHIRIKI KATIKA MCHAKATO KIPINDI AKIWA WAZIRI MAMBO YA NJE, ASEMA ALIKUTANA NA MAMA MWENYE NYUMBA NA KUAGIZA ALIPWE DOLA MILIONI MOJA HARAKA, AKAMPA OFA KUJA MBUGA YA NGORONGORO

 

Tausi Ally

ALIYEKUWA Balozi wa Tanzania nchini Italia, Profesa Costa Mahalu ameiambia Mahakama ya Hakimu Mkazi Kisutu kuwa Rais Jakaya Kikwete wakati akiwa Waziri wa Mambo ya Nje na Ushirikiano wa Kimataifa, alifahamu kuwepo kwa rasimu mbili za mikataba ya ununuzi wa jengo la Ubalozi wa Tanzania, Italia.

Profesa Mahalu alisema hayo jana mbele ya Hakimu Mfawidhi, Ilvin Mgeta wakati akitoa utetezi wake dhidi ya kesi inayomkabili ya uhujumu uchumi na kuisababishia Serikali hasara ya Euro 2,065,827.60 pamoja na aliyekuwa Ofisa Utawala wa ubalozi huo, Grace Martin.

Akiongozwa na wakili wake, Mabere Marando, Profesa Mahalu aliitambua barua ya Februari 20, 2002 ambayo ilikuwa ikieleza kuwa matayarisho yote ya ununuzi wa jengo la ubalozi huko Italia yamekamilika ikiwa ni pamoja na rasimu mbili za mikataba.

Mahalu alidai kuwa katika mchakato wa ununuzi wa jengo hilo wakati yeye akiwa Balozi chini ya Wizara ya Mambo ya Nje na Ushirikiano wa Kimataifa, kulikuwa na rasimu mbili za mikataba na kwamba aliwahi kuwasiliana na wizara hiyo juu ya mikataba hiyo.

Alidai kuwa Desemba 2001, Kikwete wakati huo akiwa Waziri wa Mambo ya Nje na Ushirikiano wa Kimataifa alikwenda Rome, Italia kwenye Mkutano wa SADC na alipokuwa huko, ubalozi ulifanya mpango atembelee jengo hilo lililopendekezwa kununuliwa kwa ajili ya ofisi ya ubalozi.

“Wizara ya Mambo ya Nje ya Italia ilifanya mipango yote kwa kumpa utaratibu na usalama Kikwete ambapo alikwenda kutembelea jengo hilo na kukutana na mama mwenye jengo,” alidai Profesa Mahalu.

Alidai kuwa kabla ya mazungumzo na mwenye nyumba, mtoto wa mama huyo, Alberto alimtembeza Kikwete kwenye jengo hilo ndani na nje na baadaye mazungumzo hayo yaliendelea.

Balozi Mahalu alisema baadaye mazungumzo kati ya Kikwete na mama huyo yaliendelea na Alberto alikuwa akitafsiri, kwa sababu mama yake hakufahamu lugha ya Kiingereza.

Profesa Mahalu alidai kuwa katika mazungumzo hayo, Kikwete alimwuliza mama huyo: “Hivi ni kwa nini kunakuwa na mikataba miwili?” na mama huyo alimjibu kuwa hiyo ni kawaida kwa Italia ukitaka kununua jengo kwa bei nafuu.

Profesa Mahalu aliendelea kudai kuwa baada ya kupewa jibu hilo, Kikwete hakuzungumza tena zaidi ya kucheka na kwamba mwenye jengo alimkumbusha kuhusu malipo ya awali ya dola milioni moja za Marekani ambapo aliafiki na kuahidi kuwa zingelipwa kabla ya mwisho wa mwaka 2001.

Profesa Mahalu alidai pia kwamba Kikwete alimweleza mama huyo kuwa atalishughulikia suala hilo baada ya kurejea Dar es Salaam na kumshukuru kwa kuwauzia jengo zuri.

Baada ya kutoa maelezo hayo, Profesa Mahalu alidai kuwa baada ya Kikwete kusema maneno hayo, alimgeukia na kumwambia: “Costa ni vizuri tupate hela tumlipe huyu mama watu wengine wasije wakachukua hili jengo.”

Profesa Mahalu alidai kuwa baada ya Kikwete kumshukuru mama huyo kwa ukarimu wake, alimkaribisha Tanzania awe mgeni wa Wizara ya Mambo ya Nje yeye na mumewe na kwamba watampeleka Ngorongoro.

“Tulipokuwa njiani tukirudi hotelini alipofikia Kikwete akiwa kwenye gari alimpigia simu Kibero akimuagiza afanye utaratibu wa kulipa Dola milioni moja kama malipo ya awali ya jengo hilo,” alidai Profesa Mahalu.

Alidai kuwa baadaye alimwagiza (Profesa Mahalu) aje Dar es Salaam kufuatilia mpango huo wa malipo ya awali ya ununuzi wa jengo hilo.

Awali, Profesa Mahalu akiongozwa na Wakili Alex Mgongolwa alidai kuwa anaitambua ripoti ya uthamini wa jengo hilo la ubalozi nchini Italia uliofanywa na Kimweri kutoka Wizara ya Ujenzi aliyekwenda Rome Julai 15 hadi 26, 2001 kwamba jengo lilikuwa na gharama ya Sh6 bilioni.

 

Soma zaidi www.mwananchi.co.tz

JK omba samahani sasa kwa wana-Njombe

Leo nazungumza na Rais Jakaya Kikwete, huku nawe, msomaji wangu ukishiriki kusoma yale nitakayomwandikia hapa kiongozi huyu wa Tanzania na watu wake.

Mheshimiwa rais wangu, samahani ni neno dogo sana, ingawa linabeba maana kubwa na thamani kwa wanaojua umuhimu wake. Kwa wasiojua, tunawasamehe na kuwahimiza kutafuta umuhimu wake. Mara nyingine, samahani hubeba maana sawa na kuomba radhi.

Elimu ya kujua umuhimu wa samahani wala haipatikani shuleni. Haipo darasani; kwamba atasimama mwalimu na kuueleza umma wa darasa kwamba maana ya samahani ni hii na umuhimu wake ni huu.

Ikiwa wapo walioanza kufundishwa umuhimu na matumizi ya - samahani-darasani, basi hao wana ulakini katika mizizi walikotoka.

Mara zote, samahani - huanza kufundishwa kutoka ndani ya familia. Hufunzwa na wazazi. Wakafuata wanafamilia wengine na baadaye jamii inayomzunguka mtoto. Jamii hapa ni majirani. Ni wanamtaa na idadi nyingine ya watu anaokutana nayo mtoto hasa katika viunga vya michezo.

Samahani limekuwa chachu ya kumaliza vinyongo vingi. Limetumika kumaliza migogoro; mikubwa na midogo na zaidi sana limekuwa chanzo cha amani na kujenga daraja la maelewano katika mazingira ambayo yamegubikwa na mifarakano na hata minyukano.

Linaposemwa neno samahani na kukubaliwa na upande wa pili, basi amani hutamalaki na woga, wasiwasi au lawama hupotea kabisa.

Mtu anapoteleza katika kauli na sana sana anaposhindwa kutekeleza ahadi zake, basi hupaswa kuomba samahani na ikibidi, ikifuatiwa na sababu za kushindwa huko.

Ikiwa muungwana ataghafirika katika kauli zake au matendo yake, basi haraka, baada ya kutambua, hujitokeza na kuomba samahani na waungwana wenzie na hata wale wasiokuwa waungwana, humwelewa na kumuheshimu zaidi na zaidi.

Kuomba samahani, siyo utumwa. Sio woga wala kamwe siyo kujidhalilisha mbele ya jamii. Hakuna samahani inayoenda bure. Lazima hubeba heshima inayostahili.

Tena samahani inapoombwa na mtu mkubwa, kiongozi wa familia, kiongozi wa jamii na hata kiongozi wa nchi, hubeba maana kubwa zaidi na kuwa na uzito wake.

Wanaoshindwa kuomba samahani ni watumwa. Ni watu wasiojiamini na mbaya zaidi ni binadamu wasiothamini wengine kwa dhati.

Anayethamini na anayependa wenzake, huumia sana anapogundua ameteleza mahali na haraka haraka, akiwa muungwana wa vitendo, huwaendea na kuwaomba samahani.

Tangu Januari 2, 2012, nimekuwa nikisubiri kupokea samahani ya Rais wa Jamhuri ya Muungano wa Tanzania, Jakaya Mrisho Kikwete, Sijaipata. Sijaisikia kutoka kwenye kimywa chako au hata kwa wale wanaomkuzungumzia kwa nafasi yako.

Watanzania wa Njombe hawajakusikia. Mkuu wa Mkoa wa Iringa Dk Christine Ishengoma hajakusikia. Mkuu wa Wilaya ya Njombe, Sarah Dumba hajakusikia. Mkuu wa Wilaya ya Ludewa, Georgina Bundala hajakusikia.

Naibu Waziri wa Nishati na Madini, Adam Malima hajamsikia. Mbunge wa Ludewa Deo Filikunjombe hajamsikia. Aliyekuwa Katibu Mkuu Kiongozi, Philemon Luhanjo hajamsikia. Itoshe tu kueleza kwamba hakuna aliyemsikia.

Kwanini hawakusikia? Kwa kuwa hujajitokeza kuomba samahani kwao kwani walikuwapo wote wakati 'ukiapa' kwamba lazima Njombe itakuwa mkoa Januari Mosi, 2012.

Wote tuliokuwapo pale Kijiji cha Mawengi, Ludewa (Mkoa wa Njombe?), tulikusikia na kukuona ukisisitiza kuwa lazima kufikia muda huo Njombe itakuwa mkoa mpya na siyo vinginevyo.

Uliwaeleza wananchi kwamba serikali imekuwa ikitoa ahadi kuhusu mkoa huo na wote waliokuwapo pale, kama kawaida ya Watanzania wengi, tulikuamini na kuamini kuwa kwa kuwa kauli inatoka kwa mkubwa mwenyewe, lazima sasa itakuwa kweli.

Kama nilivyoanza kueleza. Muda sasa umefika kwako, JK kujitokeza na kuomba samahani kwa kushindwa kutekeleza apizo lako kwa watu unaowaongoza.

Ukifanya hivyo utakuwa umeonesha kiwango cha juu mno cha uungwana na uongozi uliotukuka badala ya kuendelea kukaa kimya huku unaowaongoza, hasa wa Njombe wakishindwa kuelewa unafikiria nini baada ya kutotekelezwa kwa uliyoyatoa kinywani mwako na kurekodiwa kwa ajili ya kumbukumbu.

Narudia tena, kuomba samahani siyo woga wala kujidhalilisha, bali ni kiwango cha juu cha uungwana na kujali.

JK jitokeze sasa kuomba samahani na kueleza sababu za kushindwa kutekelezwa kwa apizo lako la kuhakikisha Njombe inakuwa mkoa mpya.

Ukituomba samahani, tutazidi kumheshimu zaidi na kuwa kipimo cha uungwana wake ambao mara nyingi tunauona katika maeneo mengine ya misiba, kutembelea wagonjwa na kuwajali Watanzania wenzake.

Nifikie kwa mawasiliano haya: 0754 020880/0655 274060: simon@simonmkina.com;

 Source: www.simonmkina.com

WARAKA MAALUM KWA DR. MWAKYEMBE

NAKUTUMIA salamu zangu za pole popote ulipo Dk. Mwakyembe. Wakati
wengine wamezoea kusema ugua pole, mimi nikimbilie kutumia lugha ya
Kiingereza kidogo ili niweze kueleweka ninaposema ‘Get well soon.’

 Nimeanza kukupa pole Mwakyembe, kwa sababu najua historia ya ugonjwa
wako ilianza tangu Oktoba 9, mwaka jana ulipougua na baadaye kuonekana
haja ya kupelekwa nchini India kwa matibabu zaidi.

 Mara kadhaa Waziri wa Ushirikiano wa Afrika Mashariki, Samuel Sitta,
amekuwa akijitokeza hadharani kukusemea, akidai kwamba ugonjwa wako
unatokana na sumu.

 Hata hivyo, Februari 17, mwaka huu, Mkurugenzi wa Upelelezi wa Makosa
ya Jinai (DCI), Robert Manumba, alisema kwa mujibu wa taarifa zilizopo
Polisi ambazo wamezipata kutoka Wizara ya Afya na Ustawi wa Jamii
zinaonesha kuwa hukulishwa sumu.

 Manumba alisema kuwa waliwasiliana na Wizara ya Afya ili kubaini
chanzo cha ugonjwa wako, na taarifa ikawa hiyo, kwamba hujalishwa
sumu.

 Kamishna Manumba alisema hata kabla ya madai ya Sitta, Jeshi la
Polisi lilikuwa linafanya uchunguzi kuhusu madai yako ya kupokea
ujumbe wa kutishiwa maisha na kwamba lilikuwa linaendelea na jukumu
hilo ambalo nadhani bado halijakamilika.

 Hata hivyo siku moja baada ya kauli hiyo ya DCI Manumba, Dk.
Mwakyembe; kiongozi wangu, ulieleza kukerwa na kile ulichokiita
taarifa za uongo kwa wananchi, ikiwa ni pamoja na kuingilia utaratibu
wa matibabu yako bila idhini yako.

 Katika taarifa yako, ulifafanua kuwa si lazima mtu anyweshwe sumu ili
imdhuru, bali inaweza kumdhuru hata kwa kugusishwa, tamko ambalo kwa
hakika linapingana na la Sitta, anayetia bidii kukusemea, anayedai na
kusisitiza kwamba umelishwa sumu.

 Mwakyembe, kimsingi hapa nimechanganyikiwa na naomba uniweke sawa,
maana utolewaji wa haraka wa taarifa yako, umekuja wakati ambao
haukutarajiwa, kwa sababu kwa jinsi taarifa zinavyovumishwa ni kwamba
hupo hoi, ndiyo sababu nashindwa kuamini hiyo haraka ya kujibu na
nadhani ulikuwa umeiandaa taarifa na kuiweka kabatini ikisubiri tukio?

 Nasema hivyo nikiamini alichokisema DCI Manumba kuhusu afya yako
hakikuwa tamko rasmi la Polisi, bali ni jibu alilotoa kwa ufupi, baada
ya kuulizwa swali la ghafla na mwandishi wa habari ambapo alitaka
kujua hatua iliyochukuliwa kuhusu madai kwamba ulipewa sumu.

 Wakati nakuandikia waraka huu napenda ujue kwamba, ninaamini katika
ukweli na haki na kamwe, sifanyi kama Pilato kuruhusu hukumu kwa Yesu,
japo yeye haoni kosa.

 Ninachelea kusema kuwa kweli DCI Manumba alitoa taarifa kuhusu afya
yako bila kupanga kwa kuwa siku hiyo alikuwa anazungumzia rasmi
taarifa kuhusu mwenendo wa uhalifu nchini kwa kipindi cha mwaka jana.
Japo hoja hiyo iliyojibiwa kwa ufupi, ndiyo ilitawala vichwa vya
habari siku iliyofuata. Kwetu “sisi washika kalamu”, “bad news, good
news”.

 Manumba alilenga na kujikita kuzungumzia namna kasi ya ukuaji wa
kiwango cha uhalifu ilivyokuwa nchini kwa kipindi cha mwaka jana,
jitihada na mbinu zilizotumika kuukabili uhalifu huo, pamoja na mbinu
za kuudhibiti kwa siku zijazo. Ingawa Mwakyembe usishangae kuona mambo
muhimu yote yaliyotolewa taarifa kuhusu usalama wetu tuliyaacha, ili
tutoe habari kukuhusu, lakini tukiamini itauza!

 Ndiyo maana katika kujibu swali la mwandishi huyo, DCI Manumba
alikuwa makini kusisitiza kuwa, ile ni taarifa kutoka Wizara ya Afya;
kwamba ndiyo inaonesha hivyo, akijua kwamba hazungumzii ushahidi, bali
moja ya vyanzo vyao vya taarifa nyingi walizonazo za uchunguzi wao
kukuhusu.

 Kama mimi ningekuwa ndiye wewe ambaye ni mbunge na mmoja wa mawaziri,
nikizingatia kuwa watu wanapenda kujua hali ya kiongozi wao,
ningejitokeza hadharani kuwaambia wananchi ukweli kuhusu tatizo langu
kabla wengine hawajanisemea kwa usahihi au kimakosa, ama kwa
kuchokozwa waseme kwa mujibu wa taaluma zao.

 Ni bahati mbaya kwamba badala ya kujitokeza, umekuwa kimya hadi
wengine wanakusemea katika mazingira yasiyofaa, ilhali uwezo huo unao
mwenyewe kama ulivyofanya baada ya kuchokozwa na waandishi kupitia kwa
DCI Manumba.

 Kwa mfano, kwa kuwa unakiri kwamba umelishwa au kugusishwa kama si
kunusishwa sumu, siku ile ulipokuwa katika Kanisa la Ufufuo na Uzima
la Kawe, jijini Dar es Salaam ukasema tangu utoke India hiyo ndiyo
ilikuwa siku yako ya kwanza kuvaa viatu, ungesema kabisa pia kuwa
tatizo linalokusumbua kwa mujibu wa vipimo ni hili.

 Kwa kuwa wewe ni msomi na kiongozi mkubwa serikalini, Watanzania hapo
wangetarajia pia useme mwenyewe sumu kama ulipewa, ulilishwa,
uligusishwa au ulinusishwa lini, wapi na nani alihusika ili jamii
imjue ‘mchawi’ wako.

 Ijulikane wazi kuwa viongozi nao ni watu kama ulivyo wewe na mimi,
hawana mkataba rasmi na Mungu juu ya kufa au kuugua. Hawana kinga ya
ziada dhidi ya maradhi kama walivyo watu wengine na kwa msingi huo,
tusiende na kufika mahali ambapo suala la ugonjwa nalo linaweza
kutumika kama mtaji wa kisiasa.

 Hata hivyo waraka wangu kwako Naibu Waziri wangu Mwakyembe, haulengi
kukulaumu au kukuongezea mawazo katika wakati huu mgumu wa changamoto
ya ugonjwa, kwa sababu nadhani katika hilo kuna uwezekano mkubwa
kwamba ulighafirika kutokana na hali ya ugonjwa.

 Wito wangu kwako na kwa wengine wa ngazi yako inapotokea mkapatwa na
mdororo wa afya na kukawa na mkanganyiko wa fikra miongoni mwa watu,
ni vema mnapopata nafasi mjitokeze kuzungumza na wananchi. Kwa sababu
si jambo la ajabu sana wala si wa kwanza kudhoofika kiafya!

 Rafiki yangu Mwakyembe, najua unaumwa na unahitaji mapumziko, lakini
naomba ujue kuwa kiongozi hasa wa serikali kama waziri, anapokuwa
mlalamikaji dhidi ya serikali ile ile anayoitumikia, anatengeneza
mazingira mabaya ya kujishushia heshima na kutoaminika, jambo ambalo
linaifanya jamii imtazame na kumdhania kwamba ana jambo jingine sirini
ila anatafuta pa kutokea.

 Hata hivyo, kwa mujibu wa taarifa yako, nadhani unaamini kuna dalili
ya kutoaminiana ndani ya serikali. Dawa ya hali hii si kulumbana
wakati ambao unahangaikia afya yako, bali ni kuutii wimbo wa msanii
aitwaye ‘20 Percent’, unaosema, “Yanini malumbano, ya nini maneno?
Najiweka pembeni kuepusha msongamano.” Toka, kaa pembeni.

CHANZO: Tanzania daima